文｜陳致綸／台北南門教會青年，師大台文所碩士生
咱對這 ê 老母對身體欠缺的囡仔 ê 疼，拄仔好就親像是上帝對伊 ê 囝兒 ê 疼仝款。
殘障者多林
「我——我——知伊——因為我的殘障，真——見笑。」（《天使》，頁75）
佇王貞文牧師 ê《天使》小說〈麻油雞佮芳草橄欖雞〉文章內底，有一 ê 人物號做多林，自伊 ê 彼句話，chiâⁿ 明顯通知影，伊是一 ê「殘障」，伊對家己 ê 身分其實有不止仔複雜 ê 心情，一方面伊清楚知影家己 ê 身體有窒礙，所以佇日常生活中，伊其實足堅強；但是若講著 in 老母，伊逐擺就是真容易發性地，原因就是，雖罔伊已經大漢，in 老母就是共伊看做是細漢囡仔，所有的代誌攏共chhoân kah 好勢好勢，致使多林會感覺，這款的保護，予伊真有壓力：
「我——我——無愛伊保護，伊的保護是一款壓制，是侵著我私人生存權的代誌。總講一句，她無尊重我，佇她的心目中，我永遠是——是——是重擔互她煩惱，互伊——見——見——見笑。這個社會看輕殘障的人，伊嘛綴潮流走。」（《天使》，頁76）
多林 ê 老母
其實對這篇小說，除了看著殘障者的困境，咱嘛通看著做為一 ê 照顧者 ê 老母，為這 ê 身體欠缺 ê 囡仔付出偌爾仔濟。咱對這 ê 老母對身體欠缺的囡仔 ê 疼，拄仔好就親像是上帝對伊 ê 囝兒 ê 疼仝款，無論囡仔佇啥物款情境、拄著啥物困難，就算愛付出真大 ê代價，到會予序細感覺壓迫、想欲閃避，總是彼 ê 疼 bē bat 改變，彼 ê 疼會一直佇遐，用行動、用話語，表現對囝兒 ê 疼痛，也 siāng 時佇遐，等待囡仔重新經驗這款深刻 ê 疼，然後和好。
其實咱佇小說內底，通看著多林佮 in 老母ê互動，雖然感覺排斥，總是到尾仔，伊知影這 ê 疼 ê 重量，來恢復 kap 老母的關係。這，敢毋是 kap 咱和上帝的關係仝款 mah？
