文、圖｜陳致綸／台北南門教會青年，師大台文所碩士生
彼款佇疼ê內面自由行踏、體驗上帝，是偌爾仔予人懷念！
★線上刷卡支持文字事工★1.掃QR碼 2.收到刷卡簡訊請回報資料(點入)
做出外人ê大學生活
到今，猶會記得頭擺踏入徛佇大肚山腰ê校園時，彼款對新環境kap未來生活的期待kap歡喜；踮校園行踏散步，享受四圍大學氣氛，猶是感覺欲開始佇臺中、佇這ê會當看著廣闊台灣海峽ê所在生活，若像咧眠夢。
受地方教會kap大專團契陪伴
因為父母攏無讀大學，所以對我干焦要求一項事：毋通離開教會，愛會記得去做禮拜。就因為按呢，揣著離學校上近ê沙鹿教會，閣捒我去參加大專團契。在我攏是真生份ê經驗，這毋只是我頭擺成做「出外人」，閣是孤身踮佇這過去毋捌深刻熟似過ê城市，去認捌、去探索遮的人，去品嘗這ê城市ê氣味，其實心內不免淡薄仔緊張。我已經袂記得踮臺中ê頭一暝是按怎睏落眠ê，總是我干焦會記得，我不斷咧對家己講：「對這馬開始，就真正愛對所行、所做完全負責矣，無人會閣替我設法，替我『拭尻川』」囉！」
總是這款緊張並無維持蓋久，因為生活當中予我操煩ê大、細項代誌，佇沙鹿教會青少年團契，抑是大專長青，攏通揣著分享、改敨壓力ê管道，也佇同工服事ê過程中，彼此結連、交陪相通；閣因為靜宜弘光長青ê關係，也得著東榮教會濟濟關心。通講，教會kap團契ê生活，大大消除對新環境ê不安，予我通徛在面對所欲來的新挑戰。了後，對臺中那熟似，就漸漸對參與者，轉換做籌備者，對我來講閣較是無仝款ê挑戰。檢采佇高中時就經歷過活動籌備ê辛苦kap壓力，毋過佇大專階段所愛考慮的各種因素，是超過進前所經驗--ê；總是因為按呢，我通認捌無仝學校、無仝背景ê朋友kap同工，也佇當中彼此相疼。
懷念佇疼內面ê日子
這霎已經離開臺中兩年外矣，猶不時會想起彼幾年，我佇台中、佇海線、佇沙鹿生活、賴賴趖ê日子，彼款佇疼ê內面自由行踏、體驗上帝，是偌爾仔予人懷念！
