作者︱張德麟 (牧師，中山醫學大學台文系退休教授)

我bat佇中山醫學大學台文系教「台灣語文進階」這門課。教材用1969年以前ê白話字《台灣教會公報》。教材ê內容我揣二種：一種是對台灣近代文明有貢獻ê文章；另外一種是kap台灣文學有牽連ê作品。佇chhiau–chhōe白話字對台灣近代文明有影響ê文章彼段時間，我有注意著「廣告」。亦佇準備用廣告文做教材ê時，注意著「得恩堂」ê廣告。

1932年5月，《台灣教會公報》開始有符合現代定義ê廣告。咱nā提彼陣ê廣告kap這陣ê來作比較，會當看出真濟真趣味ê物件，「得恩堂」ê廣告是其中之一。

今仔日咱nā聽著「得恩堂」，頭一個反應是，伊是台灣戰後頭一間目鏡連鎖公司。毋拘，咱nā倒轉去二十世紀三O年代，咱會看著一個家族經營商品ê變遷史。

「得恩堂」佇《教會報》（註1）刊廣告ê時間，對1932年12月一直到1939年7月。伊頭一擺刊廣告賣ê物件是萬年筆kap冊。到1935年3月，得恩堂ê廣告增加樂器(手風琴)kap士林刀。到1935年7月得恩堂開始代理美國ê皮膚藥膏「家蓮不二膏」。1936年2月，得恩堂分做兩間：廖恩助留佇台南，繼續賣冊、萬年筆、士林刀kap名畫；其他ê小弟轉去高雄，經營冊、萬年筆kap藥品。我特別注意著，對1936年2月到1939年7月這中間得恩堂ê廣告有兩項特色：一項是1939年7月最後一擺廣告，chiah出現「眼鏡」。第二是1936年2月，得恩堂ê廣告出現家蓮不二膏以外ê濟濟藥á，「補腎丸」是其中之一。1938年2月到1939年6月，得恩堂ê廣告干單廣告「補腎丸」這項藥á，廣告文mā變做一篇真精采ê文章。1939年7月，得恩堂佇《教會報》刊日本時代ê最後一擺廣告，chiah kā這種紹介單一產品ê現象改轉去以前濟濟商品做伙紹介ê方式。

「補腎丸」ê廣告文用白話字寫，下面我kā伊譯作漢羅。這篇文章刊在日本時代，台語有淡薄á日本味(下面ê廣告文用1936年2月ê版本)。

補腎丸

這項藥，無論男婦老幼，病後、產後、失元氣--ê，kap下消、白帶--ê，吃了卡濟大功效！Iā寒、熱、飫、飽；干單食，抑是配鹽水，或是tīm，攏好！一日食三擺，1擺2錢重。這項藥，好食！便宜！利便！免khiūⁿ！人kā伊號做“散鄉人補藥”。全島濟濟位，再三來注文規十斤！頂年有中部ê朋友對內地tì真傷重ê chhìn-nah轉來；我提一粒親像細粒圓á大ê見本品予伊食。過幾偌分鐘；伊講，“我ê身軀攏轉燒！”衫掀開看，身軀攏好好！對這ê朋友ê紹介，有銷chiâⁿ百斤。

這項補腎丸，前年佇台南市內，有人一斤照定價賣3箍，庄社有人4兩定價一箍賣7角；iā阮1斤定價3箍，賣箍6，今(taⁿ)漢藥有項起幾偌倍貴！不得已1斤賣箍8，5斤賣7箍半，10斤賣13箍。前金--ê，免送料；代金ín oāⁿ--ê，送料oá加一。（註2）

佇日本時代《教會報》ê廣告，iáu有什麼特色？足濟！後擺chiah擱講。佇遮干單擱講一項：彼陣ê廣告，醫館、藥房、產婆廣告ê總量超過一半。Kap這陣《教會報》真無仝。這陣，「禮儀公司」占差不多三分之一。

註；

1. 《台灣教會公報》佇歷史上，改幾偌擺名，佇《台灣教會史ê台文筆記》中，有時稱《台灣教會公報》，有時簡稱《教會報》。

2. 最後一句ê意思是：「先付款ê，無加運費；貨到chiah納錢--ê，加一成ê運費」。這是廖恩賜長老佇十年前kā我講--ê。