He是tī聖誕節前一工發生ê tāi-chì，為tio̍h beh爭取時間，我駛車前往長期配合ê廠商—彰化田中川石電路板工廠，川石是一間庄kha ê鐵皮屋小工廠，頭家阿欽因為工作ê關係，kah我成做好朋友。

阿欽是有求必應ê工作好同伴，hit工下晡，伊為我製做工程樣品，到黃昏ê時刻，伊kā我講：「James，暗時聖誕暝我一定tio̍h去教會，你先tńg去台北，回頭我ē做暝工kā你完成樣品，明á早起寄hō͘ --你，好--無？」我心內想講難得落來到田中，kui氣陪伊去教會，教會soah了koh再tńg來工作，án-ne我 to̍h ē-tàng親自帶電路板tńg--去，阿欽mā真歡喜答應。

阮就án-ne前往田中教會，當我tī教會辦公室外面四界觀看ê時，聽tio̍h辦公室內阿欽kah別人用十足ê台語teh講話。了後，阿欽kah一个阿啄á行--出-來，我好奇問：「Tú-chiah kám是lín teh講話？」In仝聲講：「無m̄-tio̍h！」

我驚奇對阿欽講：「你台語講kah hiah好，iáu有中部特有ê用語。」

阿欽笑笑á講：「阮lóng用台語做禮拜，我iáu teh學習neh！」Koh講：「神父來台灣傳道幾十年，伊已經是台灣人--ah。早期天主教、基督教深入庄kha起教會，傳福音soah融入台灣人ê生活，m̄-nā用物資支持、幫助台灣，koh深耕台灣，kah台灣建立深厚ê感情。」

一直到今á日，重情義ê台灣人，類似對呂若瑟神父ê感恩回報，佳音四界傳。六工一億五千萬kan-taⁿ是一个數字，它ê kha脊後是無價ê關懷kah感恩。

順續談kóa川石ê頭家阿欽，伊是真chē hō͘人尊敬ê台灣商人之一，阮有緣成做好朋友。Tùi庄kha鐵厝小工廠頭家到台灣 LED第一大廠ê董事長，tùi公司倒店到koh再創業榮景，回頭tńg來發積欠以前員工ê資遣費，展現善良台灣人ê一面，我因為有伊chit-ê朋友感覺驕傲。