細漢重病歹處理，上主憐憫醫治伊；

謝緯彼時有答應，將來獻身予主用。

中學畢業讀南神，裝備家己愈殷勤；

東京醫專的菁英，轉來台灣獻才情。

中部山區肺癆濟，伊的時間用到底；

埔基以及療養院；照顧病人無推辭。

謝緯徛家佇南投，醫療服務到海口；

北門診所烏跤病，手術時常到半暝。

彰化二林的海邊，小兒麻痺滿滿是；

謝緯召集醫生伴，設立病院輪流看。

雖罔風颱落雨天，出門義診真歡喜；

倚靠上帝氣力大，謙卑服事無自誇。

遇著散赤的患者，伊的愛心真夠額；

謝緯行醫心通達，超越金錢的價值。

因為救人來犧牲，眾人懷念無時停；

甘願為主做戇人，榮光上帝的聖工。

醫療宣教的典範，謝緯確實疼台灣；

逐家跟綴伊所行，為著鄉土繼續拚。

附註：

1. 謝緯1916出世，1970年別世，別世到今屆滿50週年。