全世界咧tio̍h災[che]。疫情到taⁿ已經成百日。論到咱台灣，穢著病毒--ê、死亡ê人數，攏較少世界普遍ê狀況；咱ê防疫成果，通世界o-ló。咱ê百姓、百工，咱ê學生囡仔，照常choh-sit、讀冊。表面上，現此時台灣袂輸全世界「上特殊ê」國家；論真，咱是靠耶穌基督所教示，「普世--ê」精神才有通án-ne。耶穌苦勸咱，「著愛疼厝邊親像疼家己」；也就是無掠家己做「特殊」，反倒轉來看家己kap別人普遍攏無各樣。對án-ne，有法度將對家己ê疼「普遍化」hō͘厝邊。若具體來講，咱喙罨ê產能猶未達到逐家攏有份彼陣，咱會曉想「相分食有賰，相搶食無份」；咱為著疫情驚惶彼陣，為政者，指揮官陳時中會曉提醒逐家，「見若人攏無想欲破病，chóng--sī，社會若將破病ê姊妹兄弟點名做記號，致到怹姑不而將想欲逃閃、掩崁，顛倒對防疫不利。」

無將人點名做記號，見若人攏仝款，攏是主ê百姓，就是一款「普世精神」。基督徒知影，獨獨上帝會當將人「分別做聖」，人家己無才調主意。對án-ne，咱看家己、看別人，干焦孤一步：上帝彼步，普遍疼kap伊同行ê人。

咱為著án-ne來感謝上帝。感謝上帝賞賜咱夠額ê知捌、夠額ê氣力，hō͘咱tī tio̍h災、烏暗ê山谷內底，較贏死失，較贏彼个試；hō͘咱靠上帝「相分食有賰」，靠上帝行「五餅二魚」ê神跡。

【編者按】本文影音檔，如下。