文｜李哲緯／向陽長老教會牧師

有某一間教會的兄姊，有一擺佇信徒的培育課程中間，提出一個問題。伊講：「頂個月我佇週報中間，看見第三禮拜是某一個單位的奉獻主日，總是彼禮拜我無法度來教會參加禮拜。我就提早佇第一個主日禮拜，先kä 欲奉獻的錢提互教會的出納，結果出納kä 我講，這筆奉獻愛第三禮拜才會當收，請我到時才奉獻。我心內想講：『我欲奉獻，教會的規矩閣hiah 濟，毋驚我起毛 bái 無欲奉獻喔！』」   

彼間教會的牧師笑笑對伊講，這個問題真好！對佇奉獻，聖經內底嘛有真清楚的教導。出納的回應是為著做帳方便，無拄拄就一定愛佇第三個主日才奉獻。總是咱猶原會當通過聖經的教導，對奉獻的觀念kap 態度有幾項的學習：   

第一， 咱的錢毋是咱的，是上帝交託咱管理的，咱是上帝的管家，管家愛照主人的意思來管理錢財。

第二， 上帝無欠用錢，上帝歡喜的是咱甘心樂意的奉獻，起毛bái 的奉獻，上帝無歡喜。

第三， 聖經清楚對咱講：「遵趁贏過獻祭；聽趁是贏過羊牨的油。」（撒上十五22）今仔日咱若願意學習遵趁上帝的話，咱所得著的恩典，的確超過奉獻本身所欲得著的報賞。

我聽了非常認同，毋知影恁豈有同意？或者是恁有無仝款的意見，歡迎恁來投稿，kap 大家分享恁的見解。