作者︱張德麟 (牧師，中山醫學大學台文系退休教授)

1932年5月以後，《教會報》chiah出現ha̍h佇現代定義ê廣告。會出現這款廣告，理由真簡單，《教會報》佇彼陣有經濟壓力，須要刊登廣告增加收入。這款ê廣告，我大約ka巡一遍。感覺佇《教會報》頂面刊ê廣告，有不止強ê基督徒色彩。下面簡單說明一下。

一、《教會報》ê廣告有「奉獻型」ê廣告

《教會報》欠錢。開始刊登廣告ê時，教會內有一寡人干單掛名贊助，無推銷任何產品。可比講，李仲義長老刊登袂少這款廣告，伊ê廣告文頂面，正爿寫萬丹，正中寫李仲義，左手爿寫東港郡萬丹庄。這款刊法用這陣ê話講，tō是奉獻。刊這款「奉獻型」ê廣告ê人有巴克禮、萬真珠、李仲義、李明家、李明道、阮朝臨、李達莊、高十三等等。

二、《教會報》ê廣告，刊登者強調伊是基督徒

這款廣告，咱用1932年5月ê一篇廣告文做例。有一位辯護士刊廣告。廣告文ê正爿寫「此人係基督教信者為人親切辦事謹慎」。正中寫「辯護士法學士安里積千代」。左手爿寫「台南市大宮町三ノ三四，電話四五九番。」，這款佇廣告文中強調刊登者是基督徒ê數量mā袂少。擱舉一例，1933年3月ê《教會報》，刊一間「三美洋服店」ê廣告。三美佇台東beh對「四月一日起」「正式開業」。佇《教會報》刊廣告。廣告ê主文攏用白話字。伊按呢寫：「洋服裁斷師及職工招聘」。本文ê第一句tō寫：「本店是台東教會熱心ê信徒開--ê……。」伊招聘師父，第一項條件是：「實在ê基督徒」。這款廣告不止有會內ê人ê特色。

三、刊登者請牧師、前輩寫推薦文

這種ê廣告，嚴格講起來， 嘛會使算第二類。毋拘，in請牧師、名人為in寫推薦文。這篇「推薦文」常常牽連著擱較濟ê人kap代誌。所以佇chia，筆者ka分別處理。

這款ê廣告，本文就用莊松榮藥房ê「全鹿丸」kap蘇振輝ê「人生醫院」做例。

莊松榮藥房ê「全鹿丸」

1933年5月莊松榮藥房ê「全鹿丸」佇《教會報》刊第一擺廣告。然後連續廣告十期到1934年2月。這十期ê廣告文攏是全版--ê，而且攏刊佇廣告ê第一頁。

莊松榮藥房ê創始者是莊溫萌先生。伊是旗後教會ê會友。所以伊請旗後教會ê牧師許水露佇廣告文ê頂頭tàu講幾句話，許水露牧師按呢寫：

莊溫萌君，就是敝旗後教會故莊發長老ê令郎。做人誠實、親切。

藥品頂真，效力真大。請欠用ê兄姐贊成試看。

這篇廣告文用白話字寫。而且iáu是ch、ts分開用。就是見若後面ê母音是a、ng、o、o.等後元音，頭前用ts，若是後面ê母音是e、i等前元音，頭前用ch。所以許水露牧師寫莊溫萌是寫「Tsng Un-bêng」。（附記：許水露牧師是高俊明牧師娘高李麗珍ê親生老父，嘛是kā我行「幼兒洗」ê牧師。）

這篇廣告文佇「莊松榮藥房」頂面有四字「登錄商標」。予咱thang知，台灣人佇日本時代已經有智慧財產權ê觀念。1883年3月，濟濟國家佇巴黎有簽一份＜保護工業產權ê巴黎公約＞。為著無beh予無正當ê競爭發生，這份公約保護有專利ê外觀設計、廠商名稱、商標……。日本人佇1899年加入，chiân做第18個會員國。台灣人是通過日本人知影智慧財產權ê重要性。譬如講1938年6月吳純仁醫師「榮安堂大藥房」ê「開胃健脾丸」，有註明「登記商號」。擱佇邊--a列「注意」二字。下文講「近有無恥之徒，假冒本藥名稱。購服諸君，必須認明本舖住所，並登記商號榮安堂藥房吳純仁，庶不至誤為要。」

按呢，咱tō會使來了解「全鹿丸」矣。這篇廣告文有三個重點：(1)「全鹿丸」是「生精補血第一良品」。(2)這項藥「功效主治」：「氣血雙補，男婦皆宜。益百虛、養五臟、固精髓、壯筋骨、定心志、安神魂……。」(3)這項藥對叨位來？佇廣告文ê左手爿，有漢字kap白話字強調這是中國天津同仁堂ê名藥。為著「天津同仁堂」這個詞，我有請教現今「莊松榮」科學中藥ê家族成員莊孝武君。伊kā我講，佇in阿公(莊溫萌) ê時代，中國同仁堂有二間：北京同仁堂kap天津同仁堂，In彼此是兄弟仔。台灣ê「莊松榮藥房」是in阿公莊溫萌開始--ê。溫萌君攏對台灣the̍h龍眼乾、nāi-chi-chí(nāi-chi-khak-á)去天津賣，順續交涉佇台灣代理天津同仁堂ê藥品ê代誌。所以佇「莊松榮藥房」ê右手爿，有特別強調「莊松榮」是「全鹿丸」ê「台灣總經理」。

莊溫萌先生有二男一女。男是莊恭仁、莊恭禮，女是莊玉帛(埔基前院長趙文崇ê老母)。莊恭仁生三男一女，莊孝彰(莊松榮製藥廠有限公司ê董事長兼總經理)、莊孝武(執行副總)、莊孝潤(總廠長)。一女莊雅惠(財務長)。莊恭禮ê後生是莊孝昌、莊孝盛。莊孝昌大學ê時佇文化長青，孝盛佇成大SCM，孝昌現此時teh讀台大景觀設計所ê博士班。孝盛目前佇竹塘教會，佇庄腳做濟濟予人感動ê工。孝盛牧師ê家庭是照叔伯排，孝彰、孝武、孝潤、孝昌、孝盛。所以孝盛是上細漢--ê。伊kā我講，伊囝仔時代是食紅棗、肉桂、甘草、龍眼乾大漢--ê。愛擱記一句，莊松榮藥廠ê家族對奉獻真kam。佇濟濟所在我攏看tio̍h in ê奉獻，親像南神、台灣聖經公會。

人生醫院

廣告ê時請牧師、名人tàu講話iáu有一個出名ê例，就是彰化ê「人生醫院」。

1933年4月，《教會報》刊台灣醫學士蘇振輝ê「人生醫院」ê廣告。這個廣告一直刊到1940年12月，頭尾總共7年外。這個廣告擱分兩個階段。第一個階段對1933年4月到1938年3月，第二個階段對1938年4月到1940年12月。第一個階段，佇廣告文正中央用白話字列15項耳鼻nâ-âu ê 症頭；第二個階段，「耳鼻咽喉科專門」這幾字斜45度，右手爿寫「彰化市東門町人生醫院院長蘇振輝」。頂二個版本攏無牧師、名人ê紹介。毋拘，1933年4月刊廣告ê時，廣告佇第24頁。佇《教會報》當期ê第18頁，有兩個人寫文章、寫詩慶賀蘇振輝開業。一篇是林燕臣ê文章「謹祝台灣醫學士蘇振輝君開業式」。另外一篇是楊註寫ê七字仔「祝蘇振輝先生開業式」。這兩篇祝賀文、詩刊佇《教會報》本文內，伊ê效果應該比廣告擱較廣告，所以筆者mā kā人生醫院ê廣告列佇遮處理。

祝賀ê詩文佇遮干單舉林燕臣老牧師ê文章做例。林燕臣寫：

竊思基督徒處世。無論所學何藝。所擇何術。不可徒求利己。亦當專務利人。正宜如塩如光，大有益於社會。方不愧為聖徒。若蘇君振輝。台灣醫學士也。方其在校也。天資明敏。學業精勤。蒙博士上村恩師之愛顧。特別傳授重要病症。蓋耳鼻喉科等症是。迨昭和五年。畢業成績優等。有蘭大衛博士物識之。特聘蘇君援助彰化醫務。不特手段成功。患者多數受其惠愛。而且、殷勤竭力。治理諸會務致中選長老之重任。并荷青年之會長。其令聞令望。教會社會。多見口碑載道。斯人也。上可歸榮於 上主。下可丕顯於慈視。幸何如也。夫蘇君之令尊。固熱誠之宗教家，數十年來牧會忠勤。聖教興隆。今也有此令息。對教會亦熱衷。肯構肯堂是父是子。同出愛　主之心。殊不可多得。茲擇彰化街東門。為住在場所。並以二階兩座之大廈。分為男女諸病室。衛生完備。定於三月二十八日。駿業開張。諒必宏圖丕振。鄙人因藉管城子。謹撰俚詞。欣為祝云。

昭和八年三月二十八日　林燕臣

這篇賀詞，筆者認為有三個所在咱著注意。頭一個，佇1933年，林燕臣前清老秀才就用「上主」稱「上帝」。這會當予咱知，講「上主」是取一字基督教「上」字，天主教一字「主」字，以後chiàh有「上主」這個詞。這種了解絕對毋對。第二，文章中講蘇振輝ê老父是牧師：「固熱誠之宗教家。數十年來牧會忠勤。」筆者有請教一寡仔前輩，親像戴忠德牧師、孫鴻鎮牧師，chiah知，蘇振輝醫生ê老父是彰化教會第二任牧師蘇育才。In攏kā我講，早期南部教會有一句名言：「做袂來，揣蘇育才；做袂成，揣高篤行。」，意思是早期牧師、牧師娘攏真gâu做媒人。若是做袂來、袂成，著揣蘇育才、高篤行。對這句話thang知，in兩人ê口才相當好，真gâu kā 人苦勸。第三，林燕臣老秀才ê文章後面記時間是「昭和八年」，是1933年。許雪姬教授總策劃ê《台灣歷史辭典》一版一刷第1348頁有「蘇振輝」詞條。王美雪寫蘇振輝「曾與蘭大衛院長共同募款改建彰化基督教醫院，1935年在彰化市開設耳鼻喉科醫院，……」這段文字，時間真明顯記m̄對。是1933，毋是1935。王美雪是參考《國史館現藏民國人物傳記史料彙編第十六輯》這本冊，可能來源tō 走精--矣。

蘇振輝醫師佇1937年tih著『傷寒』，佇台中病院(應該是這陣ê部立台中醫院)蹛院86工，險死。病後，蘇育才牧師佇1937年10月ê《教會報》寫一篇〈蘇育才ê感謝〉，感謝上帝施行拯救，救伊ê子。嘛感謝眾教會ê代禱。

蘇振輝有藝術天份，伊會e-violin，會寫詩。《新聖詩》107首〈在早佇郇城〉ê歌詞是伊寫--ê。歌詞講：「在早佇郇城各各他的山頂，歸群人及兵丁看見主受釘。救主耶穌復活，救主耶穌復活；吟講，哈利路亞！哈利路亞！今日救主復活，基督阮的王。」二次大戰後，蘇振輝佇真濟方面有表現。伊設立精誠中學，出任董事長。伊mā組織彰化市第四信用合作社，bat受選做全國信用合作社聯合社主席。伊對政治mā參與真深，bat做過第一、二屆省議員，mā bat佮呂世明拚彰化縣縣長，可惜拚輸。伊佇1997年4月15日安息，享年91歲。

干單看廣告，tio̍h看出濟濟故事，看《教會報》、《新使者》，無仝ê角度會當看出無仝ê故事。這Kám-m̄-si真趣味leh？