作者︱Ông, Bí-su(台南神學院傳道師)

就佇武漢肺炎疫情嚴重的時陣，我的囡仔阿魯（taⁿ 5 hòe）的幼稚園，tú-hó teh推故事冊《和新型冠狀病毒說Bye Bye！》來做衛生教育。伊非常kah-ì，逐日攏愛我讀一遍到兩遍。而且，伊閣畫出來，hō͘神學院ê大漢哥哥kap姊姊ioh-bī-chhai，因為畫kah真成，所以in真kín就ioh著答案。

故事冊一開始就講雖然看袂著，總是無代表無存在。Chia-ê病毒四kòe攏是。sóa接，故事引chhoa囡仔，m̄是看袂著，是愛用tio̍h的工具──電子顯微鏡來看。佇這个新的鏡頭下面有一个新世界，佇hia，所有的病毒m̄-nā看會著，閣真清楚，而且每一隻病毒攏有家己獨一無二的面。

然後，作者講起病毒會四ko̍e去旅行，會對人的喙、鼻khang入--去，hō͘人咳嗽、流鼻水、發燒、痠疼，嚴重的閣會有性命的危險。旅行需要有交通工具，就是通過人的喙瀾、鼻水kap公眾聚集，而且閣無掛喙罨。當in四ko̍e sńg，人閣聚集做伙無做好保護，就會做伙破病。

故事到chia，有一个轉變：醫生、護士kap科學家好好照顧病人，研究預防射。病毒家己也講，阮chiok驚的代誌是有人掛喙罨、殷勤洗手、環境消毒、健康生活方式。最後，閣問一个問題：「Án-ni，你知影欲如何做才m̄免驚goán（病毒）？」

通過故事冊的反省

這本故事冊hō͘ 我真濟的思考，一方面是內容，一方面是語言。

作者是用病毒的角度來講。囡仔是讀者，當teh讀的時，病毒m̄是一个伊，是你kap我的對話。這種做法，m̄是kā病毒當做恐怖ah是愛去消滅的對象，反轉hō͘ 讀的人用一種和平的態度來認識、了解病毒，以及愛如何做才thang避免病毒的影響，袂破病。

通過故事的形式，阿魯一擺一擺讀，也學習著m̄是看袂著，就無存在。伊會用「chiok 強」來形容病毒，總--是無驚惶。面對病毒，其實咱有會得做的代誌。病毒就是咱生活中的一个必然的存在，如何保護家己袂受傷害，才是重點。

M̄-kuh對我的挑戰就是如何用台語來講這个故事。雖罔我決意維持母語家庭，遇著這款醫學、公共衛生的議題，真濟台語語詞我bōe-hiáu。有一度真想欲放棄，用華語tō好，為啥物欲家己 giâ-kê？總--是欲如何看著病毒世界的畫面hō͘我感動。愛有電子顯微鏡才看有冠狀病毒；台語的世界也需要台語才有法度入--去。這个世界不只是過去，閣需要開展到今，才會有未來。

總--是台語的世界mā-nā有語言的豐富，hit內面閣有祖孫的感情聯繫、身份認同、歷史的記憶，以及hō͘ 咱thang算上帝佇台灣通過台灣基督長老教會拯救kap見證的kha-jiah（對1885年到1969年，hit段台灣基督長老教會使用白話字做紀錄的時期）。（註）

做伙思考：

1. 為啥物欲 kap囡仔講母語？Kap囡仔講母語哪會chiâⁿ-chòe一个議題？

2. 欲án-ni做的時，會遇--著的困難？ 欲如何解決？

3. 失去白話字，就失落算上帝恩典的一个工具，這款的講法，你kám有贊同？ 為啥物？

【編者按】本文影音檔，如下

附註：

Pe̍h-ōe-jī佇1865年馬雅各醫師（James L. Maxwell）來台灣的時，就已經開始將這款的書寫方式帶入來台灣。總--是真正用白話字做文字媒介、教育信徒，傳播福音的，是巴克禮的功勞。通過1885年創辦的《台灣府城教會報》（Tâi-oân-hú-siâⁿ Kàu-hōe-pò、今《台灣教會公報》）。除了台灣教會公報，到1880年代的時，無限制佇基督徒，佇民間也流傳使用。一直到1969年中華民國國民政府禁止使用白話字以前，台灣教會公報lóng用白話字來寫。所以，失去白話字這个工具，佇台灣基督長老教會的歷史的理解頂面，會造成真大的隔斷（keh-tn̄g）。