文、圖｜謝明翰／台南大專南台百合團契107級畢契，台南市中小學客語教師
校對︱何碧安／竹東基督長老教會牧師何
大專團契分𠊎兜有還較開放个價值觀，乜培養𠊎兜有思考个能力，這係大專團契摎教會團契盡無共樣个地方，盼望𠊎兜都做得將大專精神延續下去。
★線上刷卡支持文字事工★1.掃QR碼 2.收到刷卡簡訊請回報資料(點入)
從地方教會到大專團契
𠊎係從小在教會大个細人仔，又因為𠊎个個性，試著教會分𠊎當多在屋下得毋到个感受，故所𠊎雖然到外地讀大學，𠊎乜毋會試著總算自由咧，無人管𠊎去毋去教會；𠊎顛倒想愛尋該片个教會、該片个團契。
𠊎正經當感謝有大專團契這四年个生活，大專團契四年个生活分𠊎改變當多，不管係生活上，抑係價值觀，分𠊎有當多感受。像係思考个能力，這係在𠊎還細時節个教會較無講到个。比論講，牧師識開玩笑講，你兜做得疑狐𠊎，因為𠊎講个無一定係著个。換句話講，牧師講个無一定係著个，這正經係𠊎從來毋識聽過个，心肝肚想，係講牧師講个無一定係著个，佢愛仰仔做牧師呢？答案相信大家都知。
會後會
另外，𠊎一定愛分享一件事情，大專生活來到了三年生，𠊎兜南百（南台百合）團契迎接了一群一年生个學弟、學妹，當感謝有上帝个愛，分這群學弟妹在團契肚共下成長、受造就。因為在團契肚經歷了當多事情，不管係生活營，還係大專中心个聖誕禮拜、畢業禮拜，大家个感情緊來緊好。常透在聚會結束以後，共下去食宵夜，甚至還共下去山項看夜景，這係𠊎從來無想像過个大專生活。雖然有兜人因為畢業來離開，毋過𠊎這個學長還係繼續帶領一屆又一屆个學弟妹來食宵夜、看夜景。𠊎兜都會講這係「會後會」，𠊎兜乜知來參加團契毋係為著會後會，會後會這個環境係大家認為安全个環境，做得講當多平常時毋敢講个話，像係感情、抑係家庭這兜，都分大家變到還較了解對方。
延續大專精神
總講一句，大專團契分𠊎兜有還較開放个價值觀，乜培養𠊎兜有思考个能力，這係大專團契摎教會團契盡無共樣个地方，盼望𠊎兜都做得將大專精神延續下去。