作者︱A-Hoân(長老教會社青、記者)

講著我 ê 阿公，做人古意閣條直，基督信仰是伊一生中上重視 ê 代誌，甚至予人感覺有淡薄仔歹溝通。逐擺家族做伙聚餐食飯，晚輩想欲 lim 一杯麥仔酒來慶祝一下，阿公就會目眉結結，苦勸大家毋通 lim 酒。

一開始晚輩感覺真困擾，後來有巧巧仔人想著一个講法，伊 kä 阿公講：「無 --lah，聖經是叫人毋通 lim 酒醉，毋是叫人 mài lim酒，阮只是 lim 一杯止喙乾，無要緊 --lah！」聽著 an-ne，阿公無閣講話，大家總算是提著酒牌，會當佇阿公面頭前乾杯。

阿公有足濟代誌講起來 lóng 真趣味，予人感覺這个人實在古意到有 chhun。雖罔伊有真濟堅持，但是伊 ê 態度永遠是溫和謙卑，毋捌聽伊講過一句大聲話，大部份 ê 時間 lóng 是笑微微，kä 上好 ê 物件奉獻予上帝。

這 má 想起來，雖然阿公做 ê 代誌親像真愚戇，因為一生所行 lóng 遵趁聖經 ê 教示，所以逐工充滿喜樂。佇伊過身 ê 時，有真濟人lóng 真懷念--伊，甚至表達阮阿公是一个真正ê 義人，無人懷疑伊已經 teh 享受天堂 ê 福氣。

Án-ne 講起來，阮阿公其實是上有智慧 ê 人。