作者︱Chio̍h Bo̍k-bîn石牧民(國立臺灣師範大學兼任助理教授，知罪難改基督徒)

COVID-19疫情，taⁿ佇咱台灣有得著控制；總--是，世界猶無好勢。最近一禮拜，全世界一工增加十thóng萬外个病例。全球穢著病毒ê人數，chit-má較濟六百萬--ah。規个地球著災，這个苦難，hō͘ 咱來思考「上帝攝理」ê道理。咱對上帝有信。一方面，知影上帝掌權，袂hō͘ 咱擔袂起ê擔；猶一方面，相信上帝已經備辦超越肉體性命ê救贖。不而過，咱台灣有才調控制疫情，無hō͘ 伊湠開；世界其他地區，煞無法度較贏這个病毒。敢講上帝恩典無齊勻，有各樣？

論真，徛在佇信仰防疫lia̍h外，咱嘛應當藉疫情來反省信仰。防疫期間，咱看著濟濟人逐工下晡做伙關心防疫指揮中心記者會，主動了解對咱個人、家庭防疫有幫贊ê資訊。逐个人掛喙罨，知影按呢是咧保護家己，同時嘛是保護別人。規个社會，甘願家己較無方便，來同齊度過艱難。會得過，家己ài出力；毋過，家己無功勞，是靠眾大家。救恩，講落到底，嘛是按呢。上帝有備辦好勢。總是，咱著愛家己有欲愛tı̍h，才提會著。既然提著，咱著愛閣認知兩項：提有著救恩，毋是咱應該提著；知影通好去提，咱家己攏無功勞。

對這个疫情，咱按呢來反省，做基督徒ê款式，以及對信仰ê認捌。嘛對按呢來知，問題毋是「按怎做基督徒來防疫」；顛倒，做基督徒，tō是佇世間行踏，面對一切ê款式，包括防疫。

【編者按】本文影音檔，如下