讀經版本：Ruby版《聖經ê愛情、智慧文學　雅歌、箴言》，2014，台北：全民台語聖經協會

進　　度：雅歌第四章、第五章

第四章第7節　

你是完全ê súi，《巴克禮》相仝。《和合本》：你全然美麗，《現代中文》：你多麼完美！“BBE”: You are all fair, 《日文聖書》：あなたはなにもかも美しく（你是完全的美）。咱有現成的台語thang用：伊美kah chiah十全（cha̍p-chn̂g），是白話音，意思是無任何缺點。文言音讀作si̍p-choân，像講「十全si̍p-choân」大補湯。

第8節

我ê愛人á，《巴克禮》：我ê新娘，《和合本》：我的新婦，《現代中文》：我的新娘，“BBE”:My bride, 《日文聖書》：花嫁よ（新娘á）。干單《全民》kā新娘譯作「愛人á」，讀tio̍h怪怪，那像是中國人teh講話。

第8 節接續，你tio̍h tùi黎巴嫩kah我來，《巴克禮》相仝。《和合本》：求你與我一同離開黎巴嫩，《現代中文》：跟我一起從黎巴嫩下來，“BBE”: Come with me, from Lebanon,、阮認為《全民》譯了無啥sêng台語，若kā改作：「求你kah我作夥離開黎巴嫩，」是m̄是有khah順？

第11節

你ê嘴唇親像蜜房ê蜜teh滴，「蜜房」注音作“bi̍t-pô͘”《巴克禮》相仝。1873年出版的《廈英大辭典》：honey comb有兩種讀法：bi̍t-pô͘, bi̍t-pâng. 1883年出版的《英廈辭典》：honey comb, 蜜房，仝款有兩讀法：bi̍t-pô͘, bi̍t-pâng. 《台日大辭典》：蜜房，讀作“bi̍t-pâng”《臺英辭典》：bi̍t-pô͘, honey comb　阮kā兩種讀法讀hō͘教會的兄姊聽，讀作“bi̍t-pâng”khah濟人聽有。

第五章第5節尾句

我ê指頭á有沒藥汁滴tī門閂柄。《巴克禮》相仝。《和合本》：我的指頭有沒藥汁滴在門閂上。《現代中文》：當我握著門柄時，我雙手滴下沒藥，指頭滴下沒藥汁。“BBE”: and my fingers with liquid myrrh, on the lock of the door. 《日文聖書》：ミルラの滴は指から取っ手にこぼれ落ちました。（沒藥ùi指頭仔滴落去門柄。）各種版本攏譯作「門閂頂」抑是「門柄」。咱台灣話講一個人真囉唆，一項代誌一直問問kah hō͘人真煩的時，會罵講：「問kah有一枝柄。」佇chia無必要kā門閂加鬥一枝「柄」。

第7節後半

顧城牆ê人搶我moa身軀ê巾。《巴克禮》相仝。《和合本》：看守城牆的人奪去我的披肩。《現代中文》：守衛城牆的人奪走我的披肩。“BBE”: the keepers of the walls took away my veil from me. 華語的「披肩」台語叫作「幔巾」，所以「搶我moa身軀ê巾」若改作「搶我的幔巾」，會khah簡單明瞭。

第8節尾句

tio̍h kā伊講，我因為愛情來致病。《巴克禮》相仝。《和合本》：要告訴他，我因思愛成病。《現代中文》：告訴他，我因相思病倒了。“BBE”: what will you say to him? That I am overcome with love. 《日文聖書》：わたしが恋の病にかかっていることをその人に伝えると。（你tio̍h kāhit-ê人講，我為tio̍h愛情來破病。）咱台語原本tio̍h有現成「病相思」chit-ê用語，無用真無彩。而且譯文若改作：「tio̍h kā伊講，我為伊病相思。」敢m̄是加真順koh加真清楚？