文、圖｜陳致綸／台北南門基督長老教會青年，師大台文所碩士生
咱一直咧揣求安歇，總--是安歇離咱足遠、足遠。
★文字事工需要支持★1.刷卡掃QR碼 2.收到簡訊後點進→回報表←填寫資料
束縛
每一 ê 12-- 月，攏是挑戰。平常時無閒工課、無閒生活，佇年底上蓋烏暗眩 ê 時陣，閣愛備辦耶穌基督 ê 降生。檢采這是逐年有，猶是見擺拄著、見擺心煩。是 tang- 時開始，聖誕是這款予人 oân-á 期待、oân-á 煩惱 ê 節期？一個現現通聚集歡喜 ê 日子，到今卻成做對心靈 ê 束縛。
其實 m̄-nā 聖誕，無論是教會 ê 事工，抑是日常生活，tiāⁿ-tiāⁿ 會拄著這款困境，總是當咱想欲揣一 ê thèng-hó 講話 ê 人，煞往往揣無啥有，毋是講 kah 尾仔 ê 結論是「著愛祈禱」、「愈服事愈甘甜」，無就是佇肩胛頭 ê 重擔都猶未放落，就閣下新 ê；lo̍h-bóe，檢采無過勞，心中歡喜服事 ê 彼 pha 火嘛 kiōng 欲 hoa-- 去；到 chia 來，困境就 m̄-nā kan-taⁿ 肩胛頭所擔 ê額，閣愛面對人佮人關係 ê 拍歹，也對教會內大大細細 ê「關心」。
這和你我無遠，甚至是咱當 leh 面對 ê 問題。
揣求安歇
咱一直咧揣求安歇，總-- 是安歇離咱足遠、足遠。
這幾年，這 ê 概念 tiāⁿ-tiāⁿ 予人講起，就是因為這款情境愈來愈明。其實佇濟濟領域，「安歇年」這款制度已經行幾若年矣，但是佇台灣 ê 文化環境下底，歇睏就若像是啥物妖魔鬼怪；就算當咧歇，嘛毋敢予人知，所致生活ê 壓力久久無通 tháu 放。
這敢是上帝所意愛 --ê？佇這 ê 恩典 ê 節期，咱著重新共性命 ê 焦點，khǹg 佇家己 ê 心靈，也交託佇上帝 ê 面前。檢采伊就是咱 ê 頭毛也算數明明，總-- 是伊猶原會歡喜咱共一切憂悶排列佇伊 ê 面前；這款恩典，予你我有繼續拍拚 ê 氣力，也佇中間，領受閣較豐盛 ê 恩典。