文、圖｜阮以杰／東部中會信義基督長老教會牧師
著不斷學習認識環境的限制，除了打拚來成長以外，也毋通袂記咱是相當有限的人類，需要謙卑面對困境。
★文字事工需要支持★1.刷卡掃QR碼 2.收到簡訊後點進→回報表←填寫資料
出入攏同一條路
住在花東地區因為自然地理的關係，欲去外地的交通選擇並不多，向南前往高雄以及往台北的公路、鐵路路線只有那一條，常常受著天災或是人禍，造成交通中斷影響咱的行程；尤其若是開車卻塞在車隊中間的時陣，擱卡互人感覺真厭倦。
Tòa-tī Hoa-tang tōe-khu in-ūi chū-jiân tōe-lí ê koan-hē, beh khì gōa-tōe ê kau-thong soán-te̍k pēng bô chōe, hiòng lâm chiân-óng Ko-hiông í-ki̍p óng Tâi-pak ê kong-lō͘, thih-lō͘ ê lō͘-sòaⁿ chí-ū hit chi̍t tiâu, siông-siông siū-tio̍h thian-chai ā-sī jîn-hō, chō-chiâⁿ kau-thong tiong-toàn éng-hióng lán ê hêng-thêng; iû-kî nā-sī khui-chhia sòa that tī chhia-tūi tiong-kan ê sî-chūn, ko khah hō͘ lâng kám-kak chin ià-siān.
塞車的時
2021年11月初，阮有一擺放假結束欲對宜蘭轉去花蓮，頂晡有看著消息講，佇南澳發生大卡車相撞的事故，造成蘇花公路大塞車。
Jī-khòng-jī-it nî cha̍p-it ge̍h chhoe, goán ū chi̍t-pái pàng-ká tùi Gî-lân tńg-khì Hoa-liân, téng-po͘ ū khòaⁿ-tio̍h siau-sit kóng, tī Lâm-ò hoat-seng tōa-khah-chhia sio-lòng ê sū-kò͘, chò-chiâⁿ So͘-hoa kong-lō͘ tōa that-chhia.
因為事故發生在蘇澳往南澳這段沒有蘇花改通迣路的路段，阮想講無就卡晚才起行，所以差不多下午一點外出發，總是佇路裡都沒看到事故排除進度的消息，沒想到兩點開到蘇花改的洞孔口，發現猶原在塞車。
In-ūi sū-kò͘ hoa̍t-seng tī So͘-ò óng Lâm-ò chit-tōaⁿ bô So͘-hoa-kái thang se̍h-lō͘ ê lō͘-tōaⁿ, goán siūⁿ kóng bô chiūkhah--òaⁿ chiah khí-kiâⁿ, só͘-í chha-put-to ē-po͘ chi̍t-tiám-gōa chhut-hoat. Chóng--sī tī lō͘--ni̍h lóng bô khòaⁿ-tio̍h sū-kò͘ pâi-tû ê siau-sit, bô-siūⁿ-tio̍h nn̄g-tiám khui kàu So͘-hoa-kái ê pōng-khang-kháu, hoat-hiān iû-goân teh that-chhia.
那時心內想說：「害啦！」原本想說卡早回去備辦欲處理的待誌，徙攏火花去！阮就對兩點開始勻勻仔進前，到六點事故完全排除、雙向通車，約略六點半到南澳小可歇睏了後，才繼續回程。
Hit-sî sim-lāi siūⁿ-kóng:「Hāi--ah！」Goân-pún siūⁿ-kóng khah--chá tńg-khì pī-pān beh chhù-lí ê tāi-chì, sòa lóng hóe hoa--khí！ Goán tō tùi nn̄g-tiám khai-sí ûn-ûn-á chìn-chêng, kàu la̍k-tiám sū-kò͘ oân-choân pâi-tû, siang-hiòng thong-chhia, iok-lio̍k la̍k-tiám-pòaⁿ kàu Lâm-ò sió-khóa hioh-khùn liáu-āu, chiah kè-sio̍k hôe-thêng.
塞車的學習
對我來講，這是一款生活的學習，因為我本身真𠢕操煩，感覺上會錯失、受人指點的事情。總是這擺塞車的事情擱互我練習，去認識、清楚知影：
Tùi góa lâi kóng, che-sī chi̍t-khoán seng-oa̍h ê ha̍k-si̍p, in-ūi góa pún-sin chin gâu chhau-hoân, kám-kak-siōng ōe chhò-sit siū lâng chí-tiám ê tāi-chì. Chóng-sī chit-pái that-chhia ê tāi-chì koh hō͘ góa liān-si̍p, khì jīn-ba̍t, chheng-chhó chai-iáⁿ：
我會操煩是因為想要控制，掌握事情會使照我的想像來進行；不過生命本身就是無法度控制的，生活其實也是，只不過咱攏真𠢕袂記得這個道理，致到咱攏陷落佇過頭緊張的情緒中間。
Góa ōe chhau-hoân sī in-ūi siūⁿ-beh khòng-chè, chiáng-ak tāi-chì ōe-sài chiàu góa ê sióng-siōng lâi chìn-hêng; put-kò sìⁿ-miā pún-sin chiū-sī bô-hoat-tō͘ khòng-chè--ê, seng-oa̍h kî-sit mā-sī, chí-put-kò lán lóng chin-gâu bōe-kì-tit chit-ê tō-lí, tì-kàu lán lóng hām-lo̍h tī kòe-thâu kín-tiuⁿ ê chêng-sū tiong-kan.
所以著不斷學習認識環境的限制，除了打拚來成長以外，也毋通袂記得咱是相當有限的人類，需要謙卑面對困境，才袂真緊失去往前的動力。
Só͘-í tio̍h put-toān ha̍k-si̍p jīn-bat khoân-kéng ê hān-chè, tû-liáu phah-piàⁿ lâi sêng-tióng í-gōa, iā m̄-thang bōe-kì-tit lán sī siong-tong iú-hān ê jîn-lūi, su-iàu khiam-pi bīn-tùi khùn-kéng, chiah bōe chin-kín sit-khì ǹg-chêng ê tōng-le̍k.